लंगटा ह लंगटे रही लंगटे ई गाई
माई बहिन के ई अपने गरिआई,
अपना के बुझेला बड़का गवईया
बेटी बहिन के ई मंच प लुटाई।
इजत के बेंच के बनता इजतदार
भोजपुरी के रोज करता दागदार,
कान में कनउंसी लगा के खुब झुमेला
अपना के माने भोजपुरी के पहरदार।
गीत आ संगीत के ककहरो ना जाने
भीमसेन जोशी ई अपना के माने,
चोली कमर छोडि़ दोसर ना आवे
कछी के भीतरा के शास्तर बखाने।
भोजपुरी के ई सभ इजत लुटवले
भोजपुरी गायन के कोठा बनवले,
तोपल ढांपल के झण्डा बना के
घर इजत के सड़क प नचवले।
नाथे के परी अईसन गवईया के
पांत निकाली अईसन लिखवईया के,
करेजा नोचा जाला अईसन जब सुनी
तुंही समझाव राय अईसन सुनवईया के
इहो पढ़ी: देवेन्द्र कुमार राय जी के लिखल कुछ भोजपुरी कविता
ध्यान दीं: भोजपुरी कथा कहानी, कविता आ साहित्य पढ़े खातिर जोगीरा के फेसबुक पेज के लाइक करीं
